Nyurat Ring Daun Lontar

Sadurung iraga malajahin indik tata cara nyurat lontar, iraga patut uning indik piranti utawi sarana sane kaanggen rikalaning nyurat lontar.

Gambar 1. Piranti Nyurat Lontar

Piranti utawi sarana sane kaanggen rikala nyurat lontar, sakadi gabar ring ajeng inggih punika :

1.   Don tal/ rontal, sane sayaga kaangge genah nyurat. Sukatnyane manut sareng kayun soang-soang utawi manut akéhnyane sesuratan sane jagi kasalin.

2.   Pangrupak, wangunnyane sakadi lemat nanging madue rai kakalih nanging kawigunannyane mabinayan teken lemat sane kaangge majaitan. Pangrupak puniki sane pinaka 'pulpen' utawi 'potlot' rikala nyurat ring lontar.

3.   Pelik, pinaka panyepit lontar sane malakar aji tiing alit sane kabolongin nyantos tembus ring makakalih sisinyane.

4,   Tingkih utawi buah nagasari matunu utawi manyanyah, pinaka tinta anggen nyelemin aksara sane sampun kasurat.

5.   Lungka-lungka (kasur alit), pinaka aled utawi bantalan tangan rikala nyurat.

6.   Dulang kayu, pinaka tatakan rikala nyurat.

7.   Potlot miwah penggaris, kaanggen ngaris lontar mangda wenten watesan sesuratan mangda gampil.

8.   Kapas utawi tissue utawi kain alus, sane kaanggen ngedasin lontar saking laad tinta selem sane mawit saking tingkih matunu.

9.   Panakep sane malakar aji kayu, benang kemong, miwah jinah bolong, pinaka piranti ngiket lontar risampune puput kasurat.

Asapunika indik piranti utawi sarana sane kanggen rikala nyurat lontar miwah kawigunannyane soang-soang. Sane mangkin jagi kalanturang antuk nguningayang tata cara nyurat lontar.

TATA CARA NYURAT LONTAR

Nyurat aksara Bali ring rontal utawi nyurat lontar puniki, nyaratang kawagedan indik teknik nyurat sané khusus. Duaning nyurat aksara Bali ring rontal méwehan yéning saihang sareng nyurat aksara Bali ring kertas. Kawagedan ring sajeroning nyurat lontar punika, patut  pisan nguratiang  indik genah tangan rikala nguét rontal. Patut pisan kauningin, ring sajeroning nyurat lontar, agem-agemannyané patut malinggih. Boya ja ngadeg, malinggeb, napi malih nungkayak.

Ring sor puniki jagi katelatarang indik tata cara nyurat lontar.

1)   Sayagayang piranti druwé dumun, sakadi lontar, pangrupak, potlot, penggaris, tingkih, lungka-lunga, sinamian punika genahang ring duur dulang.

2)   Salantunyané, ambil tikas malinggih sané patut. Sané lanang masila, sané istri matimpuh. Utsahayang mangda rikala nyurat malih jebos tunduné mangda nénten bungkuk.

3)  Wusan punika, ambil  lontar sané sampun tragia kasurat. Inggih punika madaging 4 baris sané patut kadagingin tulisan saking duur nyantos sor tur  sampun madaging bolong ring makakalih muncuk lontar miwah ring tengah lontar.

4)   Salanturnyané, karyanang garis pinggir ring makakalih muncuk miwah tengah (tigang bolong sané wénten ring lontar), kirang langkung 0,5 cm. Margiang pariindikan punika ring makakalih sisi lontar.

5)   Risampuné lontar punika madaging garis pinggir, mangkin uratiang dumun  ngawit dija iraga pacang nyurat. Caranyané inggih punika, tentuang dumun kiwa miwah tengen lontar antuk nguratiang jarak siki bolong sareng bolong lianan. Imbanyané, yéning jarak bolong A nuju bolong B bawakan saking jarak bolong B nuju bolong C, sinah genahé nyurat ngawit saking bolong A. Asapunika taler tungkalikannyané. Cutetnyané jarak sané bawakan punika kabaos sisi kiwa lontar.

6)   Yéning sampun sakadi asapunika, sané mangkin genahang lungka-lungka pinaka aled miwah ambil lontar sané jagi kasurat kirang langkung lelima sané sampun kadagingin pelik.

7)   Sadurung ngawitin nyurat, majeng ring sang sane maagama Hindu  mangda nguncarang "Om Awighnamastu Namo Siddam" sané maagama lianan dados berdoa  manut kapercayaan soang-soang, nunas mangda nénten wénten kapiambeng sajeroning nyurat.

8)   Raris genahang tangané irika. Ring duur lungka-lungka, tangan  kiwa genahang ring sor anggén ngaledin utawi ngisi lontar. Tangan tengawan sané kaanggén ngambel pangrupak. Ngambel pangrupak punika patut pisan kauratiang mangda prasida ngasilang aksara sané becik.

9)   Tetikasnyané ngambel pangrupak inggih punika inan tangan sané tengen témpélang ring sisi kiwa pangrupak. Jeriji telunjuk genahang ring sisi duur pangrupak, miwah jeriji tengah témpélang ring sisi tengen pangrupak. Jeriji tangan tengen sané lianan, inggih punika jeriji manis miwah kacing ngenceg ring lontar,  anggén ngwantu nyaga kaajegan, miwah mawiguna jagi ngicénin bayu mangda tangan néntén gelis kenyel. Pangrupak sané kaanggén nebekin aksara inggih punika sané rainyané tanyingan.

10) Risampuné agemé sakadi punika, sané mangkin sampun prasida ngawitin nyurat.  Ring sajeroning nyurat, jeriji telunjuk sané pacang kaanggé paneen  rikala nguét aksara. Sesuratan aksara Bali punika kasurat magantung, dadosnyané kawitin nyurat aksara ring baris  kaping kalih. Duaning baris kapertama utawi baris sané pinih duur punika kaanggén genah panganggé suara.  

11) Carané ngametuang utawi nyurat aksara inggih punika gerakang tanganné sané ngagem  pangrupak sakadi anak nyurat, kawantu olih inan tangan sané kiwa sané norong inan tangan sané tengen nyantos ngawéntenan gerak sané nuju  ka tengen. Sampunang nyurat punika kaliwat alus taler sampunang  kaliwat keras rikala nebekin. Yéning kaliwat alus, sinah néntén maguét, yéning kaliwat keras sinah prasida bolong taler ngawi tangané matatu keni pangrupak. Patut nganggé pangrasa taler rikalaning nyurat mangda mapikolih becik.

12) Sesuratan aksara punika yéning mrasidayang mangda wangunnyané bunter tur nénten bes ageng. Sasuratan aksara Bali sané kawetuang punika sampunang nyantos sakadi madaging spasi utawi palas. Sesuratannyané  patut kasurat jajar sambung utawi atep-atep.  Mangda sesuratan punika proporsional irika sampun iraga patut nicapang kawagedan iraga rikala nguét aksara. Patut sabar taler nénten dados magegéson. 

13) Salanturnyané surat sampun aksaranyané  punika nyantos garis pinggir sané wénten ring bolong tengah. Garis pinggir ring bolong tengah punika pinaka wates nyurat pantara sisi kiwa lontar sareng tengah miwah tengah sareng sisi tengen lontar. Kecosin garis pinggir ring bolong tengah punika, raris lanturang nyurat nyantos puput abaris.

14) Menawi wénten kaiwangan rikala nyurat aksara, nénten patut aksara punika kaguét-guét malih. Yéning ngapus nganggé pangapus taler nénten mrasidayang. Dadosnyané, yéning wénten kaiwangan rikala nyurat aksara, iraga patut mademang aksara antuk nagingin ulu (i) miwah suku (u) ring aksara punika sapisanan.

15) Yéning rumasa kenyel, meneng ajebos raris kalanturang malih antuk agem-ageman sakadi iwawu. Risampuné sasuratan ring baris kaping kalih puput ring tengen, nglantur malih ring baris kaping tiga ngawit ring kiwa lontar nuju ka tengen malih. Asapunika pateh nyantos baris kaping lima nyantos bek halamanné punika.

16) Yéning sampun puput nyurat nyantos baris kaping lima utawi puput ring siki halaman, lanturang malih sesuratannyané antuk madingin lontar punika ka sisi sané malih asiki utawi badingin lontar sané betén ka duur.

17) Raris surat malih ngawit baris kaping kalih ring sisi kiwa lontar nyantos puput ring tengen miwah salanturnyané nyantos puput kasurat ring makakalih sisi lontar.

18) Yéning lontaré sampun puput kasurat , wawu kaselemang antuk nganggén tingkih utawi buah nagasari sané sampun matunu utawi manyanyah. Tata caranyané inggih punika : genahang lontar sané sampun kasurat ring duur dulang. Raris ambil tingkih matunu punika tur kosodang ring sesuratannyané.

19) Risampuné rata kakosodang ring lontar, raris ambil kapas utawi kain alus, kosodang malih anggén ngedasin laad tingkih matunu punika. Yéning sampun kedas, sinah sesuratan iragané prasida kapanggih.

20) Yéning sampun waged utawi sampun prasida nyurat makéh lontar punika, wawu prasida kadagingin panakep. Caranyané inggih punika, sayagayang benang kemong sané lantangnyané  kirang langkung 40-50cm  anggén ngiket lontar sané sampun puput kasurat taler takep lontar sané kaanggén ngapit lontaré punika. Ring kalih muncuk benang kadagingin jinah bolong asiki-asiki anggén ngancing cakepan lontaré. Wus punika lontar sané sampun mapanakep sampun prasida kasimpen ring keropak lontar utawi genah sané sampun kacumawisang mangda prasida awét.

Gambar 2. Tetikesan Sitatkala Nyurat Lontar

Inggih sakadi asapunika prasida antuk titiang nelatarang indik nyurat lontar. Ring sajeroning kawagedan nyurat lontar, patut pisan iraga uning indik piranti nyurat lontar miwah kawigunannyané, téori indik sapunapi tata cara nyurat lontar, miwah utsaha rikala ngamargiang nyurat lontar. Yéning sinamian punika sampun tatas kauningin olih iraga sareng sami, sinah pakaryan nyurat lontar punika prasida mapikolih becik.